CEBU, Philippines - Politika maoy nakitang hinungdan sa kapitan sa barangay Balud lungsod sa San Fernando labot sa pagdakop kanila niadtong Domingo sa buntag pinasikad sa warrant of arrest.
Si Kapitan Reliso Enad nga nahinabi sa Banat News mibutyag nga dunay ‘political color’ ang pagsikop kanila kini tungod kay base sa iyang nasayran dugay nang na-dismiss ang ilang kaso maong nakapangutana sila nganong nalutsan sila og warrant of arrest.
Matud pa niini nga niadto pang buwan sa Abril nabasura ang kaso apan nalutsan sila og warrant of arrest sa Mayo 2.
“Unsay naa sa balaod maoy among gibuhat, how could we make a malicious mischief nga wala man na namo gub-a. For me, there is a political motive,” matud pa ni Enad.
Wala na sila mopiyansa kagahapon tungod kay igo nalang sila nga nagpaabot sa dokumento sa dismiss order gikan sa korte aron sila mapagawas sa karsel.
Kagahapon sa hapon nadawat sa San Fernando Police ang Dismiss Order gikan ni Municipal Trial Court Judge Glenda Go nga nagmandong pabuhian ang kapitan ug ang duha ka opisyales niini ug mga tanod. Matod pa ni SPO3 Marjokin Misuari nga nahinabi sa Banat News ila gilayon nga gibuhian ang mga opisyal.
Samtang ang acting chief sa San Fernando police nga si Insp. Crisanto Abella mipasabot nga igo ra silang mihimo sa ilang trabaho ug nahitabo lang nga Domingo sila gidakop tungod kay dunay medical mission nga gihimo sa maong barangay ug mitambong ang mga personaheng naa sa warrant of arrest.
“Mas taas gani ang ilang pagpuyo dire sa prisohan kun nianang pagka Biyernes (May 4) pa namo giserve ang warrant apan wala man namo sila makit-i, mao nga amo nalang gi-timing pag-medical mission kay naa man gyud sila tanan,” matod pa ni Abella.
Samtang si kanhi San Fernando Mayor Lakambini “Neneth” Reluya mibutyag nga aduna gyuy ‘injustice’ nga nahitabo tali sa iyang kapartido.
“ Ang pangutana ani kay nganong gi-serve pa ang warrant, and gitumong pa gyud nga naa sa medical mission ug free tuli si Kapitan (Enad) ug ang iyang mga tawo. This is a sign of injustice,” pasabot pa ni Reluya.
Gihulagway usab ni Reluya nga ‘political harassment’ ang nahitabo ug usa usab ka pamaagi aron hadlokon ang ilang mga kapartido. ‘This is clearly political harassment, another way to threaten our allies,” matud pa ni Reluya kinsa mibahad nga dunay manubag sa nahitabo sa iyang mga kaubanan.
Niadtong Mayo 6 gidakop si Enad uban ang iyang konsehal nga si Lolita Enad, Arcadio Bacasmas ug mga tanod nga silang Reynaldo Basmayor, Manuela Abellana, Apolonio Bonghanoy, Doroteo Yoco ug Fedelito Opada ug ang plumber nga si Hector Hermosa.
Sa laing bahin, gisaysay usab ni Enad nga nakadawat ang iyang asawa og text message gikan sa wala mailhing tawo nga nag-ingon: “Kung dili mo gustong mapriso duol mo ni Mayor Canoy kay andam siya nga modawat ninyo.”
Matud pa ni Enad nga niadtong ikatulong Sabado sa buwan sa Abril nila nadawat ang maong text.
Si Mayor Antonio Canoy gisuwayan pagkuha sa iyang habig apan wala kini sa diha nga gibisita sa Banat News sa iyang buhatan. (BANAT NEWS)