Demolisyon wa mahinayon apan apektadong residente mosupak gyud

CEBU, Philippines - Mibahad ang mga residente sa sitio San Miguel sa barangay Apas nga ilang panalipdan ug babagan gyud ang himuong demolisyon karong adlawa dungan sa pagsaway kang RTC Branch 10 Judge Soliver Peras nga wala moaksyon sa dokumentong gisumiter sa Office of the Solicitor General.

Si Peras kagahapon mimando sa kapolisan nga mopagawas og komento kabahin sa maong demolisyon. Ang kapolisan gimandoan sa korte sa paghatag og seguridad alang sa malinawong demolisyon subay usab sa gipangayong police assistance sa Court Sheriff nga si El Cid Caballes.

Matud ni Caballes nga dili personal kondili gibuhat niya ang iyang trabaho.

Samtang wala makahatag og aksyon si Peras sa suwat sa solicitor general gumikan sa teknikalidad sama nalang sa copy furnishing sa duha ka habig.

Samtang usa sa mga kagawad nga lakip sa maapektahan sa demolisyon, Joel Trompeta miingon nga barugan nila ang pagpanalipod sa ilang mga panimalay nga dugay na nilang gipuy-an ug kini gihatag na kanila sa gobiyerno kaniadto pa.

Giklaro ni Trompeta nga dili sila mga eskwater tungod kay gitugotan sila mopuyo sa maong dapit ug ilaha kining mapamatud-an sa ilang mga ebidensya.

“Where is fairness, where is equity,” kusganong gibutyag sa abogado sa mga residente si Benjamin Militar.

Usa ka retiradong sundalo nga si Balbino Gabutero Jr., nga usa sa apektadong pamilya daw nagmahay sa gobiyerno sa ilang gidangatan karon.

“Ang among kaagi sa una sa gubat dili lalim apan karon , basta-basta lang mi pahawaon sa among gipuy-an,” sumala pa ni Gabutero.

Mikalma ang kapin 168 ka pamilya kagahapon human wala madayon ang demolisyon apan nagpabilin silang alerto hangtud nga dunay mogawas nga desisyong pabor kanila.

Samtang nanawagan si Kapitan Ramil Ayuman sa Apas nga hunungon na ang pamolitika ug magtinabangay sila si Mayor Michael Rama ug Kongresista Tomas Osmeña nga matabangan ang mga apektadong residente. (BANAT NEWS)