Mga batan-on gitudloan pagpreserbar sa palibot

CEBU, Philippines - Ang mga batan-ong sa barangay Dumlog, dakbayan sa Talisay gipaubos sa seminar bahin sa pagpreserba sa kalikopan, matud ni Kapitan Charles Basillote.

Sumala ni Basillote nga ang maong seminar gipahigayon niadtong buwan sa Marso ning tuiga pinaagi sa mga pundok sa mga environmentalist. Ang nagpahigayon sa seminar mao si Vince Cinches, environmental consultant sa Talisay, Christine Homez, hepe sa City Planning Development Coordinator (CPDC) sa siyudad, representative sa buhatan ni city administrator Richel Bacaltos ug Edwin Nierves sa solid waste management.

Gumikan sa maong seminar namugna sa barangay Dumlog ang grupo nga gitawag nga Kabatan-onan para sa Kaugmaran sa Kalikupan (KKK) nga gilangkuban sa 100 ka mga batan-on nga nahimong sakop niini. Tumong sa pagtukod sa maong grupo mao nga aron ang mga batan-on makatabang sa pagmentenar sa paglimpiyo sa ilang barangay kay usa kini sa pamaagi sa pagpreserba sa kalikopan. Apan gawas sa pagpanglimpiyo, gisilsil usab sa mga huna-huna sa mga batan-on atol sa maong seminar ang kamahinungdanon sa pagpananom og mga bakhaw.

Ang barangay Dumlog usa ka coastal barangay nga kasikbit ra usab sa sapa sa Mananga.

Niadtong milabay’ng kasaulogan sa Earth Day ang barangay Dumlog nagpahigayon og pagpanglimpiyo uban sa KKK sa mga kanal, palibot sa barangay ug sa daplin sa kabaybayonan.

Si Basillote midugang nga higpit usab nilang ipatuman sa ilang barangay ang segregation o pagbahig sa basura nga malata ug di malata kay mao na kini ang gipatumang balaod bahin sa basura.

Ang mga environmentalist nga miseminar sa taga Dumlog mao sila Vince Cinches, environmental consultant sa Talisay, Christine Homez, hepe sa City Planning Development Coordinator (CPDC) sa siyudad   representante sa buhatan ni city administrator Richel Bacaltos ug si Edwin Nierves sa solid waste management. - Brenda D. Batuto/WC (BANAT NEWS)