Phil Navy nang-recruit og opisyal

CEBU, Philippines - Usa ka Visayan Mobile Recruitment (VMR) ang gipasiugdahan sa Philippine Navy (PN) alang sa mga kwalipikadong aplikante sa pagka-opisyal ug kawani gikan sa Mayo 9 hangtod sa Mayo 12 ning tuiga aron idugang sa ilang gikinahanglang 200 ka opisyal ug 1,500 ka mga bag-ong recruit nga kawani sa tuig 2012.

Kini gilusad sa Naval Forces Central, ang operational command sa PN, didto sa University of Cebu Main Campus sa syudad sa Sugbu sugod sa miaging Mayo 1.

Ang mga application form nga madawat hangtod ugma, Mayo 8 ipadala dayon kini ngadto sa Personnel office, Naval Forces Central.

Ang mga kwalipikadong aplikante kinahanglan nga natural nga Filipino, maayo og kinaiya , dili minyo ug nga walay gibuhing anak, adunay gitas-on nga 5 ka tiil, walay kriminal nga rekord, may pisikal ug mental nga kapasidad nga dili maluya sa mga bansay-bansay ug pasado sa Armed Forces of the Philippines Aptitude Battery Test, IQ ug espesyal nga written examination.

Ang Navy nagkinahanglan og mga aplikante nga himoong opisyal nga nagpangidaron og 21 ngadto sa 28, gradwado og upat ngadto sa lima ka tuig nga kurso sa Bachelor of Science in Electrical Engineering, Mechanical Engineering, Information Technology, Electronics and Communications Engineering, Computer Science, Accountancy, Marine Engineering, Maritime Transportation, Civil Engineering ug Naval Architecture.

Sa mga aplikante kinahanglang nakakuha og 72 ka unit sa kolehiyo ug migraduwar sa 2 ka tuig nga vocational ug associate nga kurso sa Electrical, Welding, Plumbing, Mechanics, Electronics and Communications, Aviation and Aircraft Maintenance ug Heavy Equipment Operators ug nga sila nagpangidaron og 18 hangtod 23 ka tuig.

Ang mga kwalipikadong aplikante sa pagka-opisyal ipaubos usab sa Naval Officers Candidate Course samtang ang mga aplikante sa pagka-kawani ipaubos usab sa Basic Seamanship Course. - Liezl M. Frasno-Correspondent/WC (BANAT NEWS)