Dizon misaway sa gipahayag ni Rosell

CEBU, Philippines - Nalisang pag-ayo si Konsehal Alvin Dizon kalabot sa pasangil ni Manlalaban Collin Rosell, hepe sa Division for the Welfare of the Urban Poor (DWUP) nga matud pa wala mohatag og bug-at nga kooperasyon ang mga residente sa Sitio San Miguel ngadto sa executive department sa siyudad sa Sugbu kalabot sa nag-ung-ong nga demolisyon sa ilang kabalayan karong adlawa.

Si Dizon kinsa mao usab ang tsirman sa Committee on Housing sa konseho nagkanayon nga dili na kinahanglan nga mananghid pa ang DWUP sa mga maapektohang molupyo kung ganahan sila nga motabang niini sanglit responsibilidad naman kini sa maong departamento.

Gihagit usab ni Dizon si Rosell sa pagbutyag kung unsa ang mga maayong nabuhat niini sukad pa sa miaging tuig.

Matud pa sa konsehal nga sukad sa miaging tuig, giingong may gatosan na ka mga panimalay ang naapektohan sa demolisyon sa nagkalain-laing lugar sa siyudad apan ang DWUP wala’y nabuhat sa pagbabag niini.

Samtang ang kampo sa Archangels Residents Mergence Inc. (ARMI) nga gilangkoban sa papahawaunong mga pamilya sa Apas miklaro nga makadaghan nang higayon   nga nagpadala sila og suwat ngadto kang Mayor Michael Rama ug ilang gihimakak ang pamahayag ni Rosell.

Samtang si Kapitan Ramil Ayuman sa Apas nga misaysay nga buhaton niya ang mga pamaagi sa paghangyo sa korte nga dili una ipadayon ang demolisyon karong adlawa. - Sanden J. Anadia (BANAT NEWS)