Carenderia naugdaw sa sunog

CEBU, Philippines - Naugdaw ang usa ka carenderia sa barangay Basak, dakbayan sa Lapulapu dihang kalit lang miulbo ang kayo sa miaging buntag.

Si SFO1 Atelano Beredo sa kabomberohan sa maong dakbayan miila sa biktima ug tag-iya sa nasunog nga kan-anan nga si Alex Gabutan.

Matud pa ni Beredo nga ilang nasuta nga gidagkotan ni Gabutan ang kerosene stove nga maoy gigamit sa pagluto og sud-an apan kalit lamang kining mibuto nga maoy nakaingon sa pag-ulbo sa kayo.

Ang mga silingan niya dali nga nagtinabangay sa pagpawong sa kayo busa wala kini makatapon sa kasikbit niining carenderia.

Dugang pa ni SFO1 Beredo nga ang ilang gipasirit nga tubig maoy nakapawong sa hingpit sa maong sunog.

Si Beredo mibana-bana sa kadaut sa maong sunog nga mikabat og P3,500 ug wala’y kinabuhing naangin. - WC (BANAT NEWS)