Giluba sa silingan tiyan buslot

CEBU, Philippines - Nabuslot ang tiyan sa usa ka ulitawo human kini dunggaba sa iyang silingan sa sitio Isla de Palma, barangay Looc, dakbayan sa Mandaue sa miaging kaadlawon.

Ang biktima mao si Pedro Gulbe alyas Junjun, 19, ulitawo, samtang ang suspetsado mao si Junrey Villarino alyas Saddam, 20, ulitawo, ug pulos nagpuyo sa maong dapit.

Si SPO2 John Calamba sa Presinto 5 sa Mandaue City Police Office (MCPO) nga nahinabi sa Banat News miingon nga nag-inom ang biktima ug suspetsado kuyog sa ilang mga higala sa maong dapit.

Sa paglabay sa pipila ka oras sa ilang panag-inom kalit lang mitumaw ang mainiton nga panaglalis nga misangko sa pagsinumbagay.

Dugang pa ni SPO2 Calamba nga wala makapugong ang mga gikainom nga mga higala sa biktima ug suspetsado sa pagsinukliay sa kumo niini.

Dihang gilupig ang suspetsado kalit kining milanit sa giluklok niyang kutsilyo ug walay pupanagana nga gihansak sa tiyan sa biktima.

Dihang nalup-og ang biktima nga nagkupot sa iyang tiyan uban sa mibuhagay nga dugo, dali kaayong misibat ang suspetsado ug gibiyaan ang biktima nga nagbuy-od sa yuta.

Ang mga barkada sa biktima maoy mihatud kaniya ngadto   sa Mandaue City Hospital apan human sa pasiunang pagtambal dali kining gibalhin ngadto sa Vicente Sotto Memorial Medical Center sa dakbayan sa Sugbo. Padayon pang gipangita sa kapolisan ang suspetsado. - /WC (BANAT NEWS)