Panday gipusil kritikal

CEBU, Philippines - Kritikal ang kahimtang sa usa ka panday human pusila sa ulo sa wala hiilhing mamumuno sa eskina sa mga dalan Escario ug Molave sa barangay Kamputhaw ning dakbayan sa Sugbo sa miaging gabii.

Ang biktima nailhan nga si Larry Bolo, usa ka panday sa Padelco Constructions, molupyo sa barangay Biga, dakbayan sa Toledo.

Nasayran sa inisyal nga imbestigasyon sa kapolisan nga samtang ang biktima ga-inom uban sa iyang mga kauban sa trabaho nga si Jonathan Verbo, 19 , nga taga barangay Biga, dakbayan sa Toledo ug Luciano Jimenel, 46, sa daplin sa karsada sa nahisgutang dapit kalit lang miagi ang wala hiilhing lalaki kauban sa usa ka babaye ug lalaki ug sa walay igong hinungdan gipusil ang biktima.

Matud ni PO3 Ruth Violango nga posibleng ang grupo sa biktima maoy unang nagbugalbugal ngadto sa suspetsado hinungdan nga naglagot ang naulahi hinungdan nga gipusil niini ang biktima.

Nasabak ang biktima sa ulo ug gihatud dayon sa iyang mga kauban ngadto sa Cebu City Medical Center.

Samtang padayon pang gipangita sa kapolisan ang kriminal kinsa misibat dayon human makapusil. (BANAT NEWS)