CEBU, Philippines - Ang modernong ihawan sa dakbayan sa Talisay nagpabilin sa kategoriya nga Double-A accreditation sa National Meat Inspection Services (NMIS) sulod na sa pito ka tuig.
Si Talisay City Administrator Richel Bacaltos nagkanayon nga niadtong Abril 26 ug 27 niining tuiga si Dr. Jonathan Sabeniano sa NMIS Region 1 ug Dr. Isagani Rodrigo sa National Capital Region maoy mi-inspection sa ihawan sa siyudad. Matud ni Bacaltos nga ang nahisgutang inspecting team mihangop sa proseso sa operasyon sa ihawan.
Gumikan sa maong sistema, ang maong ihawan nakamentinar sa double-A standard sulod na sa pito ka tuig sukad sa pagsugod sa operasyon niini, sumala ni Bacaltos.
Ang double-A accreditation nagpasabot nga ang maong ihawan mahimong makasuplay og karne sa tibuok nasud. Kahinumdoman nga adunay report nga may mga iro nga inihaw nga giingong gibutang sulod sa maong ihawan, apan gihimakak kini ni Bacaltos kay walay basehanan ang maong report.
Hinuon matud ni Bacaltos nga ang inspection team may nakitang ginagmay nga mga problema sama sa kakuwang og suga sa ubang mga bahin sa ihawan apan sayon ra kaayong sulbaron.
Si Bacaltos midugang nga ang NMIS magpadala matag buwan og tawo nga mosusi sa ihawan sa dili pa mabahas ang akreditasyon niini ning buwana, Mayo. (BANAT NEWS)