Giluba sa kauban mata naigo

CEBU, Philippines - Samaron ang mata sa usa ka lifeguard nga trabahante sa beach resort sa sitio Buyong sa barangay Maribago, dakbayan sa Lapulapu human dunggaba sa kauban niini sa miaging hapon.

Ang biktima mao si Alvin Taneo, 32, ulitawo ug ang suspetsado mao si Gerry Abesia, 42 , minyo, ug kauban usab nga lifeguard nga trabahante sa Cebu Beach Club nga nahimutang sa maong dapit.

Si PO2 Carlos Barluado sa homicide section sa kapolisan sa maong dakbayan nga nahinabi sa Banat News miingon nga nagkabikil ang biktima ug suspetsado labot sa ilang trabao hangtod nga wala makapugong sa ilang kaugalingon ug nagkasinumbagay.

Tungod kay giuwang sa ilang mga kauban , nahunong ang ilang pagsinumbagay ug mipauli sa ilang balay ang suspetsado apan mibalik kini nga nagdala na og kutsilyo.

Diha-diha giduol sa suspetsado ang biktima ug gidunggab sa iyang kutsilyo.

Apan gumikan kay abtik nga nakaatras ang biktima wala kini masabak sa lawas, apan ang iyang mata maoy nakudlitan sa tumoy sa kutsilyo.

Matud pa ni PO2 Barluado gisundan pa og daghang dunggab ang biktima apan abtik kaayo kining milihaylihay busa wala na makaigo kaniya ang suspetsado hangtud nga kini misibat sa kabalaka nga madakpan siya sa mga polis.

Si SPO2   Calamba miingon nga ang biktima dali nga gidala sa mga kauban nga trabahante ngadto sa Lapulapu City Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.

Samtang padayon pang gipangita sa kapolisan ang suspetsado. - /WC (BANAT NEWS)