Indian student pilot sikop sa buybust

CEBU, Philippines - Usa ka Indian national nga tinun-an sa pagka-piloto ang nadakpan sa buybust operation nga gilusad sa Regional Anti-Illegal Drugs Special Operations Task Force (RAIDSOTF)-7.

Nadakpan sa grupo ni Insp. Hendrix Bancoleta sulod sa Villa del Rio sa barangay Talamban ning dakbayan sa Sugbu si Vaibhav Rana kinsa nagtuon pagka-piloto sa usa sa mga flying schools dinhi sa Sugbu ug nagtrabaho usab isip yoga instructor.

Ang suspek gikatahong mibaligya og pinaugang marijuana sa poseur buyer sa kapolisan hinungdan sa pagkasikop niini.

Nakuha gikan kaniya ang mga pinaugang marijuana sa sulod sa usa ka plastic bag ug usa ka ceramic pipe. Gibanabanang mobalor og P5 mil ang maong marijuana.

Sa laing bahin, usa ka 28-anyos nga lalaki ang nadakpan tungod sa paghupot og mga pinaugang marijuana ug kutsilyo diha sa barangay Looc sa lungsod sa Oslob .

Ang nadakpan mao si Jupiter Quezon Yeullaran nga taga barangay Magapas, Sibulan, Negros Oriental kinsa nakit-ang kadudahang nagbahasbahas sa maong barangay maong kini gipadakop.

Misuway unta kini og ikyas padulong sa Poblacion apan naabtan sa mga polis

Sa pagrekisa sa suspek nakuha gikan niya ang usa ka kutsilyo ug ang bag nga dunay 55.78 gramos nga pinaugang marijuana matud ni PO2 Allan Villasurda. (BANAT NEWS)