Kap sa Apas wala tagda sa mga apektado sa demolisyon

CEBU, Philippines - Wala igsapayan ni Kapitan Ramil Ayuman sa Barangay Apas sa siyudad sa Sugbu ang padayong pag-snub kaniya sa mga panagtigom sa mga sakop sa homeowners association sa sitio San Miguel, barangay Apas nga gikatakdang demolison ugmang adlawa.

Giingong kanunay ang mga panagtigom sa mga residente ngadto kang Kongresista Tomas Osmeña sa south district apan wala gyud imbitara si Ayuman sa maong mga kalihukan.

Apan bisan paman niini si Ayuman mipadayag nga padayon gihapon ang iyang pagtabang ngadto sa iyang mga konstituwente ilabi na sa maapektahang molupyo bisan pa man nga wala siya makadawat og imbitasyon gikan kang Osmeña.

Giangkon niyang ang sitwasyon karon   nabutangan na og “kolor politika.”

Kahinumduman nga mipasalig si Osmeña nga tabangan ang 168 ka pamilya sa Apas nga dili gyud sila mapahawa sa ilang gipuy-an.

Apan si Ayuman nakasabot kung nganong wala siya gipaapil sa mga tigom nga gidumala sa kongresista sanglit kaalyado man siya ni Mayor Michael Rama, si Ayuman maoy usa sa gihugonhugonang apil sa lineup ni Rama sa sunod nga piniliay.

Panghinaot ni Ayuman nga ipadaplin una ang politika aron mahatagan og tulin nga solusyon ang nakaung-ong nga demolisyon ug gikinahanglan ang panaghiusa karong panahona (BANAT NEWS)