Managsuon napaig

CEBU, Philippines - Paig nang naabtan sa mga ginikanan ang duha nila ka anak nga lalaki human nasunog ang ilang panimalay pasado alas-10 sa miaging gabii sa sitio Sinsin barangay Sam-ang syudad sa Toledo.

Ang mga namatay mao silang Alexander Borgador Jr., 2-anyos ug ang magulang niini nga si Harvey, 5-anyos.

Sa pakighinabi sa Banat News ni Toledo Fire Investigator SFO2 Constancio Alcover ang amahan sa mga bata nananghid sa iyang asawa nga mamalit og tuba ngadto sa ubos nga bahin sa ilang lugar gibanabanang 200 metros ang distansya. Matud pa ni Alcover nga wala tuguti sa asawa ang bana tungod kay nakainom na kini apan wala kini panumbalinga sa bana ug mipadayon sa pagdulhog aron makapalit og tuba.

Tungod kay dugay kini nakabalik gibiyaan sa inahan ang duha ka anak aron apason ang bana tungod kay hubog na kini.

Ang balay sa pamilyang Borgador walay kuryente maong naggamit lang sila og lampara nga maoy gibilin sa inahan ngadto sa iyang mga anak nga nangatulog ug gitrangkahan ang ilang balay.

“Gisiguro pa niya og salay sa atop ang lampara para di kuno makab-ot sa mga bata. Unya ingon siya naa sila’y iring ug naa sad mga ilaga sa balay langas kaayo posible maoy nakasabod sa suga,” matud pang Alcover.

Dangtan og pipila ka gutlo nakadungog nalang ang magtiayon og sininggitay sa mga silingan nga nagbitbit og balde ug tubig padulong sa dakong kalayo sa ibabaw nga bahin diin mahimutang ang balay sa mga Borgador.

Nagkarakara sa pagdagan ang duha balik sa ilaha apan naugdaw na ang ilang balay nga ginama sa nipa ug kawayan bisan paman sa pagtinabangay sa ilang mga silingan nga mapawong kini.

Sumala pang Alcover nga unom ka hose ang ilang gigamit aron lang makaabot sa panimalay nga adunay gilay-ong 300 ka tiil gikan sa nahimutangan sa ilang firetruck. Sa gihimong clearing operation diha na nila makit-i ang duha ka napaig nga lawas sa mga batang Borgador. Nagtuo si Alcover nga misuway gyud og gawas ang mga bata apan tungod kay gitrangkahan kini wala sila makagawas. (BANAT NEWS)