Seguridad sa tugpahan, terminal ug pantalan pahugtan pa

CEBU, Philippines - Miumol og Technical Working Group (TWG) ang mga awtoridad alang sa paghigpit sa seguridad sa mga pasahero sa seaport, airport ug sa mga bus kagahapon sa buntag.

Matud ni Acting Assistant General Manager of Mactan, Cebu Airport Romeo Bersonda gituyo aron matutukan ang pagpalambo sa seguridad ug kaluwasan sa mga pantalan, tugpahanan ug terminal sa rehiyon.

Kini gihimo tungod sa padayong pagdagsa sa mga turista dinhi sa Sugbu ug ang nagkataas nga insidente sa mga krimen.

“Security measures are on going, it should not stop. We just need to improve it for the safety of our passengers,” pasabot pa ni Bersonda.

Gibutyag usab ni Bersonda nga ang technical working group ang gitahasan nga mo-review sa mga security measures ug kun aduna silay makit-an nga angay usbon, mahimo kini nilang irekomendar sa Regional Peace and Order Council (RPOC).

Gipanglantawan usab NI Bersonda nga dako kini og tabang alang sa mga pasahero kay kini alang man sa ilang luwas ug hapsay nga pagbiyahe.

Sa laing bahin, gibutyag ni Deputy Regional Director for Operations Police Sr. Supt. Louie Oppus nga ang maong lakang ilang gihingusgan dili lang sa Sugbu kondili lukop Central Visayas.

“We are doing this to ensure the safety of our passengers as well as to promote tourism in our region,” dugang pa ni Oppus.

Gitataw usab ni Oppus nga sa pagkakaron nakig-alayon na sila sa mga ahensya sa Cebu Ports Authority, shipping companies, Maritime Industry Authority (MARINA), Philippine Ports Authority ug uban pang ahensya sa kagamhanan aron mahimo kining epektibo.  (BANAT NEWS)