Misampak sa poste 1 patay

CEBU, Philippines - Patay ang usa ka lalaki samtang naangol ang tulo ka kauban niining nag-angkasay sa motorsiklo dihang sila nabangga diha sa national highway sa Barangay Poblacion, Alcantara kagahapon sa buntag.

Ang namatay diha sa Badian District Hospital mao si Jimboy Gabonada, 19, nga taga Barangay Saavedra, Moalboal tungod sa grabeng kadaot nga nahiaguman sa kalawasan.

Samtang naangol sila si Erwin Tarambulo, 17; Dolatre Sandoval, 16; ug Linara Cabagan nga gidala sa mao gihapong tambalanan ug gibalhin sa Vicente Sotto Memorial Medical Center sa Cebu City.

Si Sr. Insp. Juan Casipong, ang hepe sa Alcantara police chief, miingon nga si Cabagan maoy nagmaneho sa motorsiklo ug angkas niini ang tulo padulong sa Barangay Palanas sa Moalboal dihang nahitabo ang aksidente.

Matud pang Casipong kusog kaayo ang padagan ni Cabagan sa motorsiklo ug pag-abot sa kurbadahong bahin sa dalan duol sa St. Augustine Parish Church nawad-an kini og kontrol ug nasampak sa kongkretong poste sa kuryente.

Tungod sa kakusog sa pagbangga nangalagpot ang mga biktima hinungdan sa ilang pagkaangol. Wala pa matino kung hubog si Cabagan dihang nahitabo ang aksidente apan giingong accident prone area ang maong lugar.  (BANAT NEWS)