12 Ka tuig nga gikadena

CEBU, Philippines - Human sa 12 ka tuig nga gikadena sa ilang panimalay, usa ka 36-anyos nga lalaki ang naluwas sa mga sakop sa Argao police inubanan sa mga sakop sa Department of Social Welfare and Development ug TV5 news team sa Barangay Capio-an kagahapon.

Apan ang 64-anyos nga amahan nangangkong kini iyang gibuhat sa anak aron kini maproteksyonan tungod kay kini adunay deperensya sa pangisip.

Human matangtangi og kadena gidala sa mga awtoridad sa psychiatric ward sa Vicente Sotto Memorial Medical Center sa Cebu City alang sa eksaminasyon.

Si Insp. Alejandro Batobalonos nga hepe sa kapolisan sa Argao miingon nga diha nila siya nakuha sa usa ka payag tupad sa balay sa mga ginikanan ug may kadena ang tuong tiil niini, giingong hatdan lang kini og pagkaon ini og tingkaon.

Dugang pa sa hepe nga dunay mga higayon nga kaniadto gireklamo sa mga silingan ang maong lalaki nga magbitbit og sanggot ug manggukod sa mga silingan ug tungod niini gigaid kini sa amahan.

Ang pagluwas kaniya natigayon dihang usa sa iyang mga igsuong babaye ang naluoy kinsa adunay higalang nagtrabaho sa TV5 station sa Manila ug didto nangayo og tabang kung unsaon pagtabang ang iyang igsuon aron kini madala og tambalanan.

Pinaagi sa maong impormasyon ang TV5- Cebu mao nay mipahibalo sa Argao Police Station bahin sa maong lalaki.

Matud pang Batobalonos gusto gyung mapahiling sa igsuong babaye ang gigaid nga igsuon apan giingong ang amahan nila supak niini tungod kay siya isip usa ka tambalan makapaayo sa iyang anak.

Dugang pa ni Batobalonos base sa impormasyong ilang nakuha, 24-anyos na ang maong lalaki dihang kini nasakit og typhoid fever ug giingong diha na magsugod ang pagkabayolente niini.

“Human kuno sa iyang sakit mura na kuno og nalain paminaw nila, didto gasugod,” matud pang Batobalonos.

Si Flordeliza Botero, ang Social Worker Officer III sa Argao miingon nga dili nila mahimong makasuhan ang amahan sa maong lalaki tungod kay ang rason niini igo lang maproteksyonan ang anak.

“Dili man sa ingon nga gipasipad-an niya kung di for safekeeping reason man,” matud pa niini.

Midugang siya nga matabangan nila pinaagi sa medical assistance ang maong lalaki apan limitado lamang ug nagkinahanglan silang magpatabang sa ubang ahensya sa gobiyerno. (EIM)  (BANAT NEWS)