Mipugakhang sa silingan gipasakaa'g 2 ka kaso

CEBU, Philippines - Kasong homicide ug multiple frustrated homicide ang kasong gitakdang ipasaka batok sa usa ka tawo nga mipugakhang patay sa iyang silingan ug miangol sa anak sa biktima ug sa lain nilang silingan.

Kini ang nasayran sa Banat News kang PO1 Milven Pelayo sa kapolisan sa Presinto 5 sa Mandaue City Police Office (MCPO) kinsa miingon nga kagahapon pa nila madawat ang death certificate ni Pedro Saladaga nga maoy ihapin nila sa kaso nga ipasaka batok sa suspetsado nga si Rodante Pelayo, 24 , lumad nga taga San Remegio, Cebu ug temporaryong nagpuyo sa sitio Sab-a sa barangay Umapad , Mandaue.

Si Senior Inspector Stephane Amamag-id, hepe sa kapolisan sa Presinto 5 mibutyag sa Banat News  nga giangkon na sa suspetsado ang maong pagpamusil.

Samtang ang duha nga naangol nga mao sila si Avelio Saladaga ug Martiniano Rusco   kinsa anaa pa sa Mandaue City Hospital daan nang miila sa suspetsado nga maoy namusil kanila.

Si Avelio sa sayo pa gidapog sa suspetsado dihang milimod kini sa pasangil nga siya’y mikawat sa kawa sa naulahi.

Apan si Pedro nga   amahan ni Avelio nga nakasaksi mihamag sa suspetsado aron unta kini sumbagon apan nakadagan ang naulahi. Apan ang suspetsado mibalik nga nagdala na og pugakhang ug gipamusil ang mga biktima nga maoy hinungdan sa kamatayon ni Pedro ug pagkaangol sa duha ka mga biktima.

Nagkagulkol na sa prisohan ang suspek. (BANAT NEWS)