Ecleo nia pa sa Pilipinas

CEBU, Philippines - Dako ang pagtuo sa Criminal Investigation and Detection Group (CIDG)-7 nga anaa ra dinhi sa Pilipinas nagtago ang kombiktadong kongresista sa Dinagat island ug Philippine Benevolent Missionaries Association (PBMA) Supreme master Ruben Ecleo Jr.

Si Sr. Supt. Jose Pante, hepe sa CIDG-7 miingon nga miumol na sila og tracker team nga mangita ni Ecleo.

Matud pa ni Pante dako iyang pagtuong nia ra kini sa Pilipinas tungod kay nakapirma pa kini sa mga dokumento sa gisang-at nilang motion for reconsideration nga giduso sa Court of Appeals.

Sumala pa ni Pante nga katungod sa mga abogado ni Ecleo nga protektahan ang ilang kliyente.

Wala usab isalikway ni Pante nga posibleng magpausab sa iyang dagway si Ecleo apan dako ang iyang pagsalig nga ang gibutang nga P150mil nga patong sa ulo niini alang sa iyang pagkasikop dako og matabang sa pagpangita kaniya.

Sumala pa ni Chief Supt. Marcelo Garbo sa pakighinabi sa mga tigbalita nga hugot ang ilang pakig-alayon sa Caraga Police Office ug nasuta nga nasigpatan na si Ecleo sa Surigao.  (BANATNEWS)