Walay lisensya nakadasmag patay

CEBU, Philippines - Usa ka 4 anyos nga batang lalaki patay human mabanggai sa usa ka motorsiklo sa sitio Tangke, barangay Ticad, sa lungsod sa Bantayan niadtong Lunes sa hapon.

Nakaangkon og grabeng kadaot sa ulo, lawas ug batiis ang biktimang si Bryan Quijano Apa, 4, molupyo sa nahisgutang dapit.

Samtang nagtingkagol na sa karsel sa kapolisan ang nakadasmag sa bata nga si Alfonso Baguio Tiro, 36, taga sitio Combado, barangay Ticad, lungsod sa Bantayan.

Si Tiro nakaangkon usab og daghang mga pangos human sa aksidente ug nasuta usab nga palso na ang rehistrasyon sa iyang motorsiklo ug wala usab kini lisensya.

Sa imbestigasyon sa kapolisan si Tiro adunay duha ka angkas nga naila nga silang Christian Magpantay Gimenez, 32, ug Rowell Marande Bravo, 16, gikan sa barangay Tamiao apan dihang pag-abot sa nahitaboan nabanggaan niini ang bata.

Ang bata gidali pagdala sa Bantayan District Hospital apan gumikan sa grabeng kadaot nga nahiaguman gideklarar kini ni Dr.James Najarro nga patay na. (BANATNEWS)