Mandaue nangandam na sa K+12

CEBU, Philippines - Agi’g preparasyon sa implementasyon unya sa programang K+12 sa Department of Education, ang kagamhanan sa syudad sa Mandaue nangusog sa pagtukod og dugang lawak-saringan sa ilang mga pangpublikong tunghaan para sa umaabot nga pag-abli sa klase karong Hunyo ning tuiga.

Gipaabot nga mas modaghan pa ang populasyon sa magtutungha sa pampublikong eskuwelahan gumikan sa pagpamahal sa mga pribadong tunghaan sa ilang matrikula.

Matud pa ni Mayor Jonas Cortes sa syudad sa Mandaue nga adunay gigahin nga P50 milyones alang sa konstruksyon sa eskuwelahan sa nagkadaiyang barangay sa syudad niining tuiga.

Dugang pa niya nga andam na karong ipagamit ang bag-ong gitukod nga edipisyo sa Mandaue City Central School nga mobalor og P3 milyones ug usab ang bag-ong gitukod nga tunghaan sa barangay Tingub nga mobalor og P11 milyones.

Ang tunghaan nga gitukod sa barangay Tingub natukod pinaagi sa pakigtambayayong sa Aboitiz Foundation Incorporated. Gawas pa niini adunay mga dugang edipisyo ang gitukod na sa barangay Banilad ug Maguikay. Pinaagi sa Private-Public Partnership, ang maong programa nakatabang pag-ayo sa syudad aron matubag ang panginahanglan sa mga lawak-saringan sa pangpublikong tunghaan.  (BANATNEWS)