Bangkero sa hantakan gikaligo og bala

CEBU, Philippines - Patay ang usa ka lalaking bangkero sa hantakan human   giatngan ug gipusil sa wala mailhing tawo samtang nagsakay sa iyang motorsiklo sa miaging alas-7 sa gabii diha sa barangay Argawanon sa lungsod sa San Remegio.

Si Edison Brignas Aton, 42, residente sa barangay Bagtik sa maong lungsod daling gihatud sa Verallo District Hospital sa dakbayan sa Bogo apan gideklarar nga patay na tungod sa daghang samad pinusilan, tulo sa dughan ug duha sa walang bahin sa iyang bukton.

Si PO2 Alfredo Mandal sa San Remegio Police Station nga nahinabi sa Banat News nagkanayon nga base sa pasiunang imbestigasyon nagsakay ang biktima sa iyang motorsiklo dihang gipara sa wala mailhing tawo ug gipusil.

Human sa pagpamusil yanong milakaw padulong sa giparking nga motorsiklo ang mamumuno ug misibat.

Matud ni Mandal nga walay nakasaksi sa hitabo apan daling gidugokan sa mga tawo ang biktima pagkahuman sa butobuto ug gihatud kini sa tambalanan sa Bogo.

Ang biktima dul-an na sa usa ka tuig gikan nakagawas sa bilanggoan human makapiyansa sa korte sa kasong frustrated murder.

Human masutang bangkero sa hantakan sa maong lugar ang biktima gimando sa hepe nga ipaguba ang hantakan, gisusi usab sa kapolisan ang report nga nalambigit sad sa ilegal nga drugas ang biktima. - BANAT NEWS