Mi-hit and run sa bata nadakpan

CEBU, Philippines - Nadakpan na sa kapulisan ang nag ‘hit and run’ nga motorsiklo nga nakaligis patay sa usa ka 7-anyos nga batang kalit milabang sa dalan sa barangay Bakagay sa lungsod sa Sibonga niadtong Lunes sa hapon.

Ang nadakpan sa kapulisan mao si Virgilio Geolin,32, ug barangay secretary sa barangay Dumalan sa lungsod sa Dalaguete kinsa natultulan human dihay silingan niining naatol nga nagsunod kaniya dihang nabanggaan niini ang bata ug maoy misumbong sa kapolisan.

Matud ni PO2 Ederlino Bacusmo sa Sibonga Police Station nga maoy usa sa nag-imbestigar sa kaso dihang nahinabi sa Banat News nga nagmotor ang silingan sa suspek nga nagsunod kaniya ug gibantayan ang lihok niini kung modiretso og tahan sa kapolisan sa hitabu.

Ang maong saksi matud pa nakakita gyud sa pagdasmag sa motorsiklo ni Geolin sa batang si Johnryll Espanola apan dihang gisundan niya kini nakit-an niyang wala kini planong motahan sa kapolisan hinungdan nga misumbong kini sa kapolisan sa Dalaguete.

Sumala pang Bacusmo ang kapulisan sa Dalaguete na maoy mitawag ug mipahibawo nila bahin sa suspek hinungdan nga ilaha kining giadto sa ilang panimalay, dihang ilaha kining gisukitsukit, sa sinugdanan kusganon kining mihimakak.

Apan dihang gipahibalo kining adunay nakakita kaniya atol sa hitabo miangkon kini sa mga polis hinungdan nga kini gisikop. - BANAT NEWS