CEBU, Philippines - Nagpadayon ang pagdaghan sa mga benepisyaryo sa Pantawid Pamilya Pilipino Program (4Ps) ning tuiga kung itandi sa miaging tuig tungod sa dakong gikatabang niini sa panginabuhi sa mga ginikanan ug edukasyon sa kabataan sa mga benepisyaryo niini.
Kini maoy gipadayag ni Marhadzda Tudtud, Coordination with Partner Agencies Officer sa Department of Social Welfare and Development (DSWD) 7 kagahapon atol sa Kapihan sa PIA.
Gibutyag ni Tudtud nga daghan kaayo ang natabangan niining 4Ps diin gawas sa edukasyon sa kabataan gimonitor usab ang kahimtang sa mga panglawas sa mga benepisyaryo kay kauban kini sa mga kondisyones nga naglangkob ning maong programa.
Ang 4Ps usa ka programa nga giumol sa kagamhanan pinaagi sa DSWD sa tumong nga katabangan ang mga kabus nga mga ginikanan nga may mga anak nga nagtungha sa elementarya nga makalahutay ug makalabang sa kalisud ug makapadayon ang ilang mga anak sa pag-eskuyla pinaagi sa paghatag og puhonan sa mga ginikanan alang sa ginagmay nga pamatigayon.
Hinuon matud pa ni Tudtud nga kinahanglang matuman gayud ang mga kondisyon aron nga magpadayon ang suporta sa kagamhanan sa mga benepisyaryo.
Samtang si Dionesia Burdas, presidente sa mga benepisyaryo sa 4Ps sa barangay Sudlon –II, ning dakbayan sa Sugbo mibutyag sa Banat News nga kining maong programa nakahatag og dakong kaayohan sa ilang barangay kay kasagaran gayud kanilang mga benepisyaryo nakatukod og maayong negosyo nga nakatabang usab sa pagpa-edukar sa ilang mga anak.
Dugang pa niya nga mapasalamaton gayud siya sa DSWD tungod kay kining 4Ps nga programa nakatabang pagbangon sa iyang panginabuhi ug nakatubag sa inadlaw-adlaw nilang panginahanglan nga sa samang higayon nakapadayon ang ilang mga anak sa pag-eskuyla.
Sa pagkakaron may 96,000 na kapin ka mga panimalay sa tibuok lalawigan sa Sugbo ang nahimong benepisyaryo niining 4Ps sa kagamhanan. - BANAT NEWS