Gwen wa apektahi sa survey

CEBU, Philippines - Gitumbok ni Governor Gwendolyn Garcia nga wala siya maapektahi sa bag-ong migawas nga survey sa Pulse Asia nga nagtumbok nga kadto lang mga reelectionist ug kanhi senador ug mga iladong mga personalidad maoy mas paboran nga pilion sa mga botante sa umaabot nga election.

Matud pa sa gobernador nga dili kasaligan ang maong resulta sanglit ang maong survey gipahigayon sa wala pa siya pormal nga mideklarar nga mokandidato sa pagka-senador.

Karong nasayran na sa nasud nga mokandidato  siya sa maong posisyon hayan nga mao na kanay higayon   nga angayang saligan ang maong survey sa Pulse Asia.

Iyang gipasabot nga ang pagpuili og senador dili lamang tungod sa kainila sa ngalan sa usa ka kandidato kundi sa kainila sa iyang mga nabuhat sa katilingban.

Si Garcia nagkanayon nga kun hatagan siya og higayon nga ma-senador, gamiton niya ang iyang mga nakat-onan ug mga kasinatian sa pagdumala sa lalawigan sa Sugbo nga nagdala og kalamboan.

Kini tungod kay nasayud siya nga kun unsay gihimo niya sa Sugbo mao usab kini ang gikinahanglan sa ubang mga lalawigan ug anhi niya ipakita ang abilidad sa pagdumala sa tibuok nasud.

Ang iyang abilidad sa pagmugna og mga programa nga nakapalambo sa Sugbo sagupon niya kini alang sa ubang mga lalawigan nga wala pa molambo sa pagkakaron. - BANAT NEWS