Duha ka balay sa Bogo girakrakan

CEBU, Philippines - Duha ka insidente sa straffing kon pagpangrakrak ang nahitabo sa siyudad sa Bogo sa managlahing barangay niini kagahapon sa alas 12:45 sa sayong kaadlawon.

Ang unang girakrakan mao ang balay ni    Ret. SPO2 Constancio Cueva Jr., 57, sa barangay Taytayan kansang balay natusak sa 78 ka mga bala sa armas sa nagkalainlaing kalibre.

Ang ikaduhang girakrakan mao ang balay ni kagawad Teofilo Berdida Tudtud, 33, minyo, sa barangay Cayam kinsa usa ka konsehal sa maong barangay.

Nasayran nga si Cueva usa ka kanhi security officer ni Mayor Celestino Martinez Jr. sa Bogo. Si Chief Insp. Ceferino Tabay Jr. hepe sa Bogo City Police Station mibutyag sa Banat News nga duha ka mga lalaki nga nagsakay og motorsiklong Honda XRM nga kolor puwa maoy gitumbok nga responsabli sa duha ka mga pagpangrakrak ug gituohang may kauban kini nga grupo nga maoy nagpasiugda sa maong hitabo.

Matud ni Chief Insp. Tabay nga ang nangatulog nga pamilya ni Cueva gipukaw sa mga   buto-buto sa armas kansang mga bala nanuasik sa bongbong ug atop sa ilang balay.

Matud pa ni Cueva nga dihang misil-ing siya sa bintana nakita niya ang duha ka lalaki tupad sa motorsiklo nga kolor puwa. Niadtong higayona mibawos siya og pabuto   nga maoy nakapabahag sa ikog sa mga kriminal ug misirit kini og padagan sa ilang sakyanan pahilayo sa maong lugar.

Ang kapolisan nakapunit og 21 ka kabhang sa mga bala sa armas de fuego sa sulod ug gawas sa pinuy-anan ni Cueva, samtang may laing 6 ka mga kabhang sa bala sa kalibre 45 nga pistola sa gawas sa balay ug nasuta nga nagguba ang mga bildo sa bintana nga nasabak sa mga bala.

Gani ang pinisik sa nabuak nga mga bildo maoy nakasamad sa bukton ni Cueva.

Samtang didto sa barangay Cayang ang kapolisan nakapunit usab og 10 ka kabhang sa mga bala   sa 9mm pistol sa crime scene ug mga tingga sa bala nga nangalumping na.

Ang kapolisan padayon pa sa ilang subsob nga imbistigasyon pagtumbok sa motibo niini sa maong hitabo.

Nasuta nga ang mga biktima sa duha ka straffing incident mga kaalyado ni Mayor Martinez. - BANAT NEWS