Kinsay angay modumala sa CNBT?

CEBU, Philippines -  Kinsa ba gyud ang angayang modumala ug mopalambo sa Cebu North Bus Terminal? Ang dakbayan sa Mandaue, ang lalawigan sa Sugbo o ang kasamtangang nag-abang nga siyudad sa Sugbo? Si kinsa man diay ang giserbisyuhan sa maong terminal? Diha pa lang matubag na ang pangutana.

Si Mayor Jonas Cortes ning bag-ohay lang mipakita og interes nga makuha og balik sa siyudad sa Mandaue ang operasyon, pagdumala ug pagpalambo sa maong terminal nga maoy gigamit sa mga bus pasaheroan padulong sa amihanang bahin sa lalawigan sa Sugbu.

Ang maong terminal natukod sa panahon pa ni kanhi Mandaue Mayor Alfredo “Pidong” Ouano nga giingong gipaabangan ngadto sa siyudad sa Sugbo sa panahon ni kanhi mayor ug karon kongresista Tomas Omeña sa kantidad nga P2 milyones matag buwan.

Apan ang pagdumala sa maong terminal dili direktang gidumala sa siyudad sa Sugbo tungod kay gipadumala kini sa usa ka North Bus Terminal Cooperative nga gidumala ni Zosimo Jumao-as.

Matud pa ang kontrata sa pag-abang sa dakbayan sa Sugbo sa maong terminal kutob pa sa 2016.

Ang maong kooperatiba mao untay mopalambo niini ilawom sa kontrol sa siyudad sa Sugbo apan wala makakita og kalamboan si provincial board member Sun Shimura sa maong terminal nga layo kaayo kung itandi sa kaatbang niining terminal nga gidumala sa Kapitolyo nga mao ang South Bus Terminal (SBT) diha sa barangay Pahina-Central sa dakbayan sa Sugbo.

Si Shimura misugyot nga sama sa SBT mas maayong ang Kapitolyo na lang ang modumala sa CNBT aron mapalambo kini. Ang mga konstituwente ni Shimura maoy mga nag-unang sumasakay sa CNBT.

Ang SBT layo ra kaayo og pasilidad tungod sa hamugaway nga pasilidad sama sa airconditioned waiting area, modernong ticketing booths, seguridad ug uban pa.

Apan si Kongresista Osmeña nga kritiko sa Kapitolyo sa iyang bahin misugyot nga mas maayong ang siyudad sa Mandaue diin mahimutang ang CNBT maoy mas angayang modumala ug mopalambo niini.

Si Cortes nagtuong mas makabenepisyo ang siyudad sa Mandaue kung sila maoy modumala niini tungod sa makolektang buhis ug uban pa.

Nunot niini si Cortes subling mimando sa Committee on Economic Enterprise sa konseho pinangulohan ni Konsehal Jimmy Lumapas nga tun-an ang kontrata tali sa dakbayan sa Mandaue ug sa dakbayan sa Sugbo bahin niini. (BANAT NEWS)