CEBU, Philippines - Ang hulagway sa popular na kaayo nga si Kongresista Ruben Ecleo sa Dinagat Island, Surigao del Norte gipakatap na karon sa kapolisan aron sa dinaliang pagkasikop sa maong opisyal.
Si Ecleo kinsa konbiktado sa pagpatay sa kaugalingon niyang asawa nga si Alona Bacolod Ecleo nahimo na karong wanted nga kriminal human sa iyang pagka-konbikto sa kasong parricide.
Gumikan niini giawhag sa kapolisan ang publiko sa pagduol sa mga police station dinhi sa dakbayan aron masinag-u nila ang dagway ni Ecleo.
Kini aron kun makita nila nga personal si Ecleo diha-diha makapahibawo dayon sila sa kapolisan ug madawat nila ang P150 mil nga ganti. Matud ni Sr. Supt. Melvin Ramon Buenafe, hepe sa Cebu City Police Office (CCPO) nga ilang gihatagan og kopya sa hulagway ni Ecleo ang tanang onse ka police station dinhi sa dakbayan sa Sugbo.
Wala isalikway ni Buenafe ang dakong posibilidad nga magpausab sa dagway si Ecleo aron dili na mailhan ang iyang pagkatawo.
Sa pagkakaron daghan ang nagtuo nga atua ra kini magtago sa Dinagat Island gumikan sa kadaghan sa iyang pribadong sundawo nga nagbantay kaniya ug andam nga mosukol sa mga otoridad nga mosuway sa pagsikop kaniya. Samtang si manlalaban Fritz Quiñanola, ang abogado sa pamilyang Bacolod, nagkanayon nga wala nay kahigayonan nga makaapelar pa si Ecleo sa iyang kaso ngadto sa Court of Appeals.
Kini human mabahas ang 15 diyas nga reglamentary period kagahapon Abril 30.
Ang maong pamahayag gihimo ni Quiñanola human niya masayri nga mikuha karon si Ecleo og mga banggiitang abogado aron manalipod kaniya sa iyang pag-apelar ngadto sa Court of Appeals.
Apan miingon si Quiñanola nga ang balaod balaod gayud ug si kinsa may molapas niini mag-atubang og silot. Matud pa ni Quiñanola nga kun mitambong pa si Ecleo atol sa promulgasyon sa iyang kaso, kahatagan unta siya og higayon nga maka-apelar ngadto sa CA.
Apan bisan pa niini ulahi na ang tanang mga gihunahunaang remedyo ni Ecleo alang sa iyang kaluwasan ug ang angay niyang paabuton mao nalang ang pagkabilanggo sa tibuok kinabuhi. (BANATNEWS)