CEBU, Philippines - Gidudahang tungod sa grabeng kainit sa panahon ning mga panahona usa ka 45-anyos nga lalaki ang napalgang patay sa iyang mga kabanay diha sa kalibunan nga bahin nga gituohang na-heat stroke sa bukirang bahin sa barangay Kanangkaan sa lungsod sa Oslob niadtong Domingo sa alas 5:00 sa hapon.
Ang patay nang nakit-an mao si Marcial Pardillo Magsucang, 45, molupyo sa maong lugar.
Matud ni SPO1 Job Sarveda sa Oslob Police Station dihang nahinabi sa Banat News subay sa inisyal nga imbestigasyon ang biktima mga alas 2:00 sa hapon nakit-an pa kining nakig-inom sa iyang mga igsuon ug mga barkada sa usa ka tindahan sa maong lugar.
Apan nianang pagka alas 4:00 sa hapon pagkahuman nila og inom nagkabuwag-buwag na sila og pagpamauli apan niabot nalang ang alas 5:00 sa hapon wala gyud mauli sa balay si Magsucang.
Ang mga kabanay misubay sa pagpangita kaniya ug diha na kini makit-ing nagbuy-od sa kalibunan nga wala nay panimuot hinungdan nga ilaha kining gidala sa Oslob District Hospital apan gideklarar kini sa mga doktor nga dead on arrival (DOA).
Atol sa pagpamauli sa mga nag-inom gikatahong naglagiting ang grabeng kainit sa maong lugar ug hubog niadtong higayona ang biktima nga nakaingon sa posibleng kamatayon niini nga gidudahan sa mga doktor nga cardiac arrest. (/EIM) - BANAT NEWS