Pamahayag sa Akbayan sayop pagsabot

CEBU, Philippines - Gipadayag sa tigpamaba sa Akbayan-Cebu nga si Mikay Dumabok nga dili mosuporta ang ilang grupo ngadto kang Gob. Gwendolyn Garcia kinsa mipadayag nga modagan pagka-senador karong 2013 nga bugnong lugaynon.

Ang pagkalambigit sa pangalan ni Garcia sa nagkadaiyang isyu sama sa katukoran sa Cebu International Convention Center, Balili Property ug uban pa maoy rason sa Akbayan kung nganong dili nila suportahan ang gobernador.

“Kanang issue sa Balili , wala pa gyud na masulbad hangtud karon. Nakalapas na sa prinsipyo sa Akbayan. Dili mi mosuporta og kandidato nga nag-atubang og kontrobersiya,” matud pa ni Dumabok.

Wala usab mahimuot ang Akbayan pakig-alyansa ni Garcia kang Mayor Michael Rama kinsa gihulagway nila nga wala makasulbad sa mga problema sa urban poor ilabi na kadtong naproblema sa yuta nga ilang gipuy-an.

Gitataw usab ni Dumabok nga nasayop lang pagsabot ang mensahe sanational spokesperson sa Akbayan nga si Risa Hontiveros kinsa misaysay nga malipayon kini nga dunay taga Visayas nga modagan pagka-senador.

“Wala man nagpasabot nga mosuporta ang Akbayan kang Gov. Gwen, kay ang gisulti ni Ms. Hontiveros nagpasabot lang nga happy lang siya nga dunay taga-Visayas nga modagan. Bisan kinsa ,duna ma’y katungod nga magpapili sa umaabot nga election,” sumala pa ni Dumabok.

Wala hinuon maklaro kung ang pamahayag ba ni Dumabok mao ra gyuy buot ipasabot sa mensahe ni Hontiveros o ang tingog sa kinatibuk-ang grupo.

Nagkanayon si Dumabok nga padayon nga nagpaniid ang iyang grupo sa kandidato nga ilang i-endorsar ug ilang siguroon nga makiangayon kini nga moserbisyo sa katawhan. – (BANAT NEWS)