Sa Mayo Uno, Legislated wage increase gipangayo

CEBU, Philippines - Nanawagan ang pundok sa kaparian ug kaobispohan sa gobiyerno nga ipatuman ang dugay nga gipangayong legislated substantial wage increase ning pagselebrar sa adlaw sa mga mamumuo nga Mayo 1.

Ang Visayas Clergy Discernment Group (VCDG) pinangulohan ni Bishop Gerardo Alminaza sa gipadala niining pamahayag miingon nga karong bulana mao usab ang kapistahan ni Senyor San Jose ang Mamumuo ug makiangayon lang nga hatagan og kahupayan ang mga mamumuo pinaagi sa makatarunganong wage increase.

Matud pa ni Alminaza ang paghatag sa gipangayong legislated wage increase pagpakita og gugma ug kaangayan ilabi na niadtong gigutom ug nanginahanglan ug magpatunhay sa dignidad sa pamuo pinaagi sa pagpanalipod sa mga katungod sa mga mamumuo.

Sumala pa niya nga mismong si anhing Papa Juan Pablo II nga gibayaw isip usa ka beato sa susamang adlaw (Mayo Uno) mipadayag sa buhi pa kini kaniadto nga midasig sa mga mamumuo pinaagi sa pag-ingon “nanguna ang pamuo labaw sa kapital.” Apan matud pa sa grupo subo nga palandungon nga ang maong pagtulon-an sa Simbahang Katoliko wala kaayo gidawat sa nasod nga giisip nga maoy sabakan sa Kristyanismo sa Asya.

“Tungod wala’y igong pagsaka sa suholan, ang tinood nga bili sa ilang suhol nitidlom. Nagpadayon pagdako ang gintang tali sa ilang minimum nga suholan ug sa presyo sa mga palaliton,” matud pa ni Alminaza.

Sumala pa sa grupo base sa survey niadtong Agosto 2011 nga gihimo sa Swiss firm UBS, ang Manila mao ang ikaduha sa aduna’y labing ubos nga ang-ang sa suholan, ug ikatulo nga aduna’y labing ubos nga purchasing power sa tibuok kalibutan.

Samtang ang pagtuon sa Ibon Foundation nagpakita nga sa 2001–2011, ang suholan misaka og 45%, samtang ang mga presyo misaka ngadto sa 62%.

Laing survey usab nga gihimo sa Social Weather Station (SWS) nagpakita nga ang insidente sa kagutom sa nasod misaka ngadto sa 22.5% sa hinapos sa 2011.

Ang atong mga kabos nga katawhan kinahanglang mahatagan og kahupayan ug ang legislated nga igong pagsaka sa suholan, usa ka hinanali nga lakang sa pagtubag sa pag-antos sa mga mamumuo, panawagan pa sa VCDG.

Dako ang pagtuo sa grupo base sa mga pagtuon nga dili dako ang mahalap sa ginansya ug labaw nang dili gyud maalkanse ang mga employers kung ihatag nila ang gipangayong P125. – (BANAT NEWS)