Aber Belleza mag-mayor sa Talisay?

CEBU, Philippines - Gihugon-hugonan nga si kanhi Bise Mayor Aberdovey Belleza sa dakbayan sa Talisay mokandidato pagka-mayor samtang si Mayor Valdemar Chiong sa dakbayan sa Naga mokandidato usab sa pagka- kongresista sa unang distrito sa lalawigan sa Sugbo sa umaabot nga piniliay sa tuig 2013.

Hinuon si Belleza igo lang mikatawa dihang gipangutana sa mga tigbalita ug wala mopahayag nga pormal bahin sa giingong magmayor siya karong umaabot nga election sa Talisay.

Uban sa iyang katawa gisubay niya ang panultihon ni Kongresista Eduardo Gullas sa unang distrito sa lalawigan sa Sugbo nga kanunay moingon nga “ang adlaw misilang para sa tanan, busa bisan kinsa makadagan sa pagka-mayor.

 Mao usab si Chiong wala kini gibuhiang opisyal nga pamahayag kalabot sa isyu nga siya mag-kongresista sa unang distrito tungod kay alang kaniya nagpabilin siyang loyal ngadto kang Kongresista Gullas.

 Si Chiong kinsa may usa pa ka termino nga tiwasonon sa iyang pagka-mayor mihatag og mensahe kang Belleza nga mipasalig nga bisan unsay mahitabo andam siyang mosuporta niini (Belleza) ilabi na sa mga laraw niini bahin sa politika. Tungod kay mura lang og usa ka kinomedya ang tanan dihang gitawag ni Belleza og Congressman Val si Mayor Chiong, busa misuliyaw sa pagpangatawa ang tanan niyang dinapit nga mitambong sa iyang salo-salo.

Hinuon mipakita siya og seryoso nga pamahayag nga nagkanayon nga sayo pa kaayo alang kaniya sa pagpakanaog sa iyang desisyon kun mokandidato ba siya o dili.

Miingon  si Belleza nga kung mohukom siya nga modagan pagbalik, nasayud siya nga daghan kaayong mobantay sa iyang lihok.

Apan gipasalig ni Belleza nga kung dili man ugaling siya mokandidato sa umaabot eleksiyon, adto siya mosuporta sa mga kandidato sa Talisay kinsa iyang makita nga makahatag og kaayohan sa siyudad.

Giawhag usab niya ang tanan nga dili magpailad sa kwarta sa panahon na sa eleksiyon aron makapanudya kini sa mga molingkod nga lider nga wala motuman sa ilang saad. Si Belleza midayeg kang Chiong tungod sa maayong pagdumala niini hinungdan nga mauswagon kaayo ang Naga nga nahimo niyang inspirasyon.

Ang mitambong sa iyang birthday party niadtong Sabado gawas kang Chiong mao sila si Mayor Nicepuro Apura sa dakbayan sa Carcar, Talisay public information officer Arturo Bas, mga konsehal sa Talisay nga sila si Danny Caballero, Val Ylanan, ug Romeo Villarante, Aldin Diaz, mga barangay health worker, mga tanod ug uban pang paryente ug suod nga mga higala ni Belleza. - (BANAT NEWS)