DAR nanudlo bahin sa gender development

CEBU, Philippines - Ang Department of Agrarian Provincial Office (DARPO) sa syudad sa Sugbo nagpatuman og mga impormasyon ug adbokasiya kalabot sa Gender and Development (GAD) ngadto sa Agrarian Reform Community (ARC).

Matud pa ni DAR information officer Gay Visitacion sa Provincial Agrarian Reform Office nga ang DAR nagpadayon sa pag-umol og mga orientation ug seminar bahin sa Gender Mainstreaming ngadto sa ARC sa tinguha nga mapalapdan ang kaalam nila mahitungod sa isyu nga tawhanon.

Kahinumdoman nga niadtong Abril 19 ning tuiga nagpahigayon sila og seminar workshop didto sa Brgy. Anonang Norte , dakbayan sa Bogo nga gipangulohan ni Officer-in-Charge (OIC) Municipal Agrarian Reform Officer Nemia Lacson.

Mikabat sa 55 ka membro sa Anonang Norte Agrarian Reform Beneficiaries Association (ANARBA) sa Bogo ang mitambong sa maong seminar bahin sa GAD nga nagtuki bahin sa ebolusyon sa tawo ug ang katibuk-ang pagkaumol niini. 

Si DARPO Cebu Chief Agrarian Reform Program Officer for Administration Andrea Paciana Labra, D.M. maoy mamumulong sa maong seminar nga mihisgot bahin sa implementasyon sa legal nga basehanan sa GAD ug ang mga legal nga proseso niini.

Atol sa maong seminar workshop, giorganisar ang grupo sa mga kababayen-an sa Anonang Norte nga gitawag nga Anonang Norte Women’s Association (ANWA).

Karong tuiga ang grupo sa kababayen-an gimandoang mopresentar sa ilang mga plano   kalabot sa Disaster Risk Reduction Program, paggama og mga proyekto sa panginabuhi ug uban pang aktibidad nga makapalambo sa komunidad.  (BANATNEWS)