Direktor sa PDEA gibutang-butangan

CEBU, Philippines - Human ilambigit sa pasangil ang kanhi regional director sa Philippine Drug Enforcement Agency (PDEA) Central Visayas bahin sa “pabaon issue” sa miaging tuig, nasuta sa gihimong pakisusi sa Banat News nga bakak ug walay kamatuoran ang maong pasangil.

Nasuta usab ning tigbalita nga ang nagpadala sa text nga wala magpaila nga napublikar sa Banat News niadtong Septembre 24, 2011 nga namasangil bahin sa ‘pabaon issue” kang kanhi PDEA Regional Director Adrian Alvariño nagtinguha lang sa pagdaot ug pagguba sa pagkatawo, imahe, ug propesyon sa maong opisyal.

Gani gikan niadtong bulan sa Septembre sa miaging tuig ug hangtud karon,   ang nagpadala sa text, wala gyud mopakita sa mga sakop sa media ilabina ning tigbalita.

Daghang nakurat ug wala motuo sa maong pasangil ngadto kang Alvariño tungod kay ang tanang gipangutana ning tigbalita bahin sa pagkatawo sa maong opisyal, ang tanan mipamatuod sa kaligdong, ka buotan ug walay dautang record   sa pangatungdanan ang maong opisyal.

Busa nasuta ning tigbalita nga makatarunganon lang nga masuko si kanhi Director Alvariño tungod sa   maong pagbutang-butang nga nakadaot sa iyang dungog ug pagkatawo.

Nasayran nga sukad milingkod si Alvariño sa PDEA nagkutay ang iyang mga kalampusan   tungod sa hugot niyang pagpatuman sa kampanya batok sa gidiling drugas sa Central Visayas ilabi na sa dakbayan sa Sugbo.

Gidudahan nga tungod sa subsob nga pagpanakop sa mga otoridad sa PDEA ubos sa pagdumala ni Alvariño batok sa mga gidudahang nalambigit sa pagpayuhot sa gidiling drogas, maoy hinungdang may mga nasuko kaniya hinungdan nga gihimo-himoan siya og estorya aron madaot ug maguba ang iyang pagkatawo .(/WC)  (BANATNEWS)