Pito ka mga grupo mag-rally sa Labor day

CEBU, Philippines - Pito ka organisasyon ang mikuha og permiso alang sa ipahigayon nilang rally unya sa Mayo 1 atol sa kasaulogan sa Labor Day nga gipangandaman usab sa kapolisan ning dakbayan. Mao kini gibutyag ni Chief Insp. Romeo Santander sa Criminal Investigation Branch sa Cebu City Police Office sa pakighinabi   sa Banat News kagahapon.

Gibana-bana ni Insp. Santander nga   ang maong mga raliyesta mokabat sa   200 ang gidaghanon sa katibuk-an inigsugod nila og pundok sa sayo sa buntag apan mahimong madugangan pa   kini kun anaa na sila sa dalan   busa mao kini ang bantayan pag-ayo sa kapolisan.

Matud pa ni Insp. Santander nga ang nakalukat na og permit alang sa maong rally mao   ang Alliance of Progressive Labor (APL), AKBAYAN, MAKABAYAN, Partidong Manggagawa (PM) ug Associated Labor Union (ALU).

Ang maong rally magsugod sa alas 8:30 sa buntag didto sa Pier 1 padung sa Colon, dayon moagi sa Cebu City Hall paatubang sa Plaza Independencia dayon mopaingon sa buhatang rehiyonal sa Department of Labor and Employment (DOLE)- 07. (BANATNEWS)