6 lakip kagawad 'nanglungkab'

CEBU, Philippines - Gipadakop ang usa ka barangay kagawad sa dakbayan sa Toledo uban sa lima niini ka mga kabanay tungod sa pasangil nga nanglungkab sa usa ka panimalay sa sitio Laguna 2, sa Brgy. Cogon- Pardo, dakbayan sa Sugbo sa alas 8:30 gahapon sa buntag.

Ang gibalhog sa karsel sa Pardo Police Station mao si kagawad Fausto Oberez, 63, molupyo sa sitio Bunga, Brgy. Lotupan, dakbayan sa Toledo uban sa mga kabanay nga sila si Mirasol Candoli, Harlyn Candoli, Bernie Gabatu, Romualdo Gabatu ug Leonardo Navarro.

Sumala pa sa imbestigasyon sa kapolisan ang grupo sa kagawad gireklamo sa usa ka Juditha Pitogo, igsuon sa tag-iya sa panimalay nga giingong gilungkab nga mao si Julito Ponce.

Si Ponce nga nag-atubang og kasong murder ug natanggong sa Pardo Police Station maoy kanhi kapuyo ni Mary Luz Candoli nga giingong iyang gipatay tungod sa selos niadtong Abril 11.Si Mary Luz mga kabanay sa mga dinakpang Candoli.

Si Pitogo matud pa midangop sa kapolisan human pugsanong gikatkat sa grupo ni Oberez ang gate sa panimalay sa igsuong si Ponce ug misulod sa balay dayong gipanguha ang mga butang sa sulod.

Matud pa gipanguha ug gisakay sa multicab sa barangay Lutopan nga gidala ni Oberez ang usa ka aircondioning unit, TV ug TV stand, DVD player, water dispenser ug kutson.

Apan si Oberez dihang gikahinabi sa mga tigbalita kagahapon diha sa presinto mipasabot nga igo ra siyang mitabang sa mga Candoli tungod kay sila ilang mga konstituwente sa ilang barangay.

Samtang ang mga kabanay sa gipatay nga si Candoli miinsister nga ilaha lang gikuha ang mga butang nga iya sa ilang igsuon diha sa panimalay sa suspek, apan kini kusganong gibabagan ni Pitogo ug miinsister usab nga ang mga butang iya sa iyang nabilanggong igsuon.

Si Pitogo dihang nahinabi sa mga tigbalita miingon nga mopasaka gyud sila og kaso batok sa mga dinakpan.

Si PO1 Benjamin Maglahos sa Pardo Police Station miingon nga ilaha pang tun-an kung unsang kasoha ang ilang ipasaka batok sa mga dinakpan. (/EIM)  (BANATNEWS)