Mag-uuma gi-salvage

CEBU, Philippines - Patay ang usa ka mag-uuma nga gituohang gi-salvage ug gibiyaan sa kalibunan sa sitio Bugtong sa barangay Kawayan sa lungsod sa Barili niadto pang Miyerkules sa gabii apan niadtong Huwebes sa alas 4:00 sa hapon na makit-i sa mga kabanay.

Ang biktima nga nagsugod na og kadugta giilang si Alberto Capacite, 45, bag-ohay pang nagpuyo sa sitio Dapda sa barangay Bugtong Kawayan sa maong lungsod.

Matud ni SPO2 Zaldy Orello sa Barili Police Station dihang nahinabi sa Banat News ang kabanay sa biktima maoy nakadiskobre sa patay’ng lawas ug gipahibalo nila ngadto sa barangay kapitan nga si Gonzalo Salinas sa barangay nga gipuy-an sa biktima.

Sa imbestigasyon sa kapolisan niadtong Miyerkules sa gabii nakadungog og tulo ka sunodsunod nga buto sa armas ang mga residente.

Ang patay’ng lawas sa biktima dunay duha ka samad pinusilan sa walang bahin sa lawas nga maoy nakaingon sa hinanali niini nga kamatayon.

 Gituohan sa kapulisan nga dunay kontra ang biktima ug giatangan kini pagpauli ug gidala sa kalibunan ug didto gipatay.   - BANAT NEWS