UV topnotcher gipahalipayan

CEBU, Philippines - Gipasidunggan kagahapon sa University of the Visayas ang tinun-an niining nag-top sa teacher’s board examination agi og pag-ila sa iyang paningkamot bisan sa kalisod sa ilang pamilya.

Si Ana Mae Villamor, 21, taga barangay Ocaña, dakbayan sa Carcar migradwar sa kursong Bachelor In Elementary Education major in General Education sa UV sa milabay’ng tuig ug nabutang sa ikalimang pwesto sa ulahing board exam. Matud ni Villamor nga lima sila ka managsuon diin siya maoy ika-upat ug 2nd year high school pa lang siya dihang namatay ang ilang amahan.

Ang ilang inahan kinsa usa ka mag-uuma maoy misuporta sa ilang tanang panginahanglan apan bisan sa kalisod wala siya mawagtangi og paglaom nga makalampos sa pagtuon.

Migradwar nga salutatorian sa high school si Villamor hinungdan nga nakasulod kini isip academic scholar sa UV alang sa iyang pagtuon sa kolehiyo apan tungod kay wala siya makamentenar sa iyang grado tungod sa mga kakulian naputol ang iyang scholarship.

Apan tungod kay pursigido siyang mohuman og kolehiyo mi-apply siya pagka-working scholar sa UV nga wala ihikaw sa pamilyang Gullas nga maoy tag-iya sa UV.

Human sa iyang third year college nasulod og grupo sa NGO si Villamor nga maoy mitabang sa pagpadayon sa iyang pagtuon bugti usab sa iyang pagserbisyo.

Si Samsam Gullas, Assistant Vice President for Administration and Finance sa UV nagkanayon nga ulian nila si Villamor sa tanan niyang nagasto bisan unsa pa kini ka gamay, hatagan usab siya og cash incentives, hatagan og scholarship sa iyang masteral ug kuhaon siya nga maestra sa elementary department sa UV.

Si Villamor dako og pasalamat sa gihulagway niyang grasya ug midasig sa mga kabus nga susama kaniya nga dili magpakawala sa paglaom ug dili angay maputlan sa pangandoy.      - BANAT NEWS