2 gipusil sa Lapulapu

CEBU, Philippines - Usa ang patay ug laing usa ang naangol sa duha ka buwag nga pagpamusil sa dakbayan sa Lapulapu atol sa nagpadayong usa ka semanang kasaulogan sa Kadaugan sa Mactan.

Ang unang pagpamusil nahitabo sa dalan M.L. Quezon sa barangay Pajo sa maong dakbayan alas- 9 pasado ang takna sa buntag ug ang biktima mao si Rowen Borja Pino, alyas Wawang, 27, nga taga sitio San Roque sa barangay Pusok samtang gitumbok nga mipusil kaniya naila lang sa bansag nga “Ryan.”

Si SPO1 Manolito Abellanosa sa Homicide Section sa kapolisan sa maong dakbayan nga nahinabi sa Banat News miingon nga usa ka Fernando Angus, 29, nga kauban ni Pino nga luwan sila og pasaheroan dihang kalit gipusil sa suspek ang biktima diha sa liog.

Human maigo natagak sa sakyanan si Pino diretso sa sementadong karsada human niini daling miambak gikan sa multicab ang suspetsado ug misibat. Si Pino gidala sa Mactan Doctors Hospital apan gideklarar kini sa mga doktor nga dead on arrival.

Ang biktima sa ikaduhang pagpamusil nahitabo sa sulod sa Parkhill Hotel sa sitio Matumbo sa barangay Pusok sa maong dakbayan alas-11 pasado ang takna sa buntag diin usa ka Eusibio Lareta Parba Jr., 29, taga barangay Laras, dakbayan sa Naga ang napusilan sa gwardiya sa maong hotel nga si Ledio Miano.

Samtang si PO2 Carlos Barluado sa homicide section sa kapolisan sa maong dakbayan miingon nga ang biktima sa ikaduhang pagpamusil nga si Parba diha sa sulod sa compound sa hotel ug nakigkukabildo sa kauban sa trabaho nga sila si Lemar Catamco, Amilito Sumalinog ug Roly Amo dihang napusilan.

Matud pa ni Barluado kalit giduol sa maong gwardiya ang biktima ug namahayag nga tapuson niini ang ilang panagbangi dayong ibot sa iyang armas nga kalibre .38 ug gipusil ang paa sa biktima.

Human niini daling miikyas ang suspek samtang gidala sa Lapulapu City Hospital ug padayon kining giatiman sa mga doktor.

Si Barluado miingon nga nagkabikil ang duha labot sa makolektang kwarta nga itunol sa mga taxi driver nga mag-atang og pasahero sa maong hotel. Hinuon si Sr. Supt. Lyndon Lawas, direktor sa kapolisan sa maong dakbayan miingon nga walay kalambigitan ang maong hitabo sa kalihokan sa Kasaulogan sa Mactan. (/EIM - BANAT NEWS