May leksyon sa Police-MIND

CEBU, Philippines -  “We are not here to be part of the problem but we are here to be part of the solution,” mao kini pamahayag sa presidente sa PNP-Defense Press Corps nga si Chito Aragon.

Si Aragon mipasabot sa mga kaubanang sakop sa media nga mitambong sa press conference kagahapon sa Cebu City Police Office (CCPO) uban sa mga opisyales sa kapolisan pinangulohan ni Sr.Supt. Melvin Ramon Buenafe labot sa planong Police Media Interaction Day (Police-MIND) sa Sugbu karong Abril 30.

Tinguha sa maong proyekto nga magkasinabtanay ang media ug kapolisan tungod sa mga pagtuong sobra ra kaayo ang media sa ilang pagbalita ug ang pangagpas usab sa media sa ubang mga polis nga mga hambugero, abusado ug nagtagotago og impormasyon.

Si Aragon miingon nga pinaagi sa maong programa malaumon siyang adunay mapunit nga leksyon ug pagtulon-an ang duha ka habig nga gikonsiderar usab ni Buenafe nga ‘partner’ sa kampanya alang sa kahapsay ug kalinaw sa katilingban.

Si Buenafe sa iyang bahin miingon nga pinaagi sa maong programa ma-promote ang transparency sa organisasyon sa PNP ug masinati usab sa media ang sitwasyon sa polis.

(BANATNEWS)