Tuition sa 16 private schools mosaka

CEBU, Philippines - Gilauman nga ubay-ubay nga mga estudyante sa pribadong mga tunghaan ang magpanon nga mopa-enroll sa mga pampublikong tunghaan karong sunod nga pagbukas sa klase tungod sa pagpasaka sa matrikula sa mga pribadong tunghaan dinhi sa dakbayan sa Sugbu.

Sumala pa sa report sa TV Patrol Central Visayas, 16 ka mga pribadong tunghaan sa elementarya ug high school ang mopasaka sa ilang matrikula.

Ang umento gikan sa 10 porsiyento ngadto sa 15 porsiyento ug moepekto kini sa pagbukas sa klase karong Hunyo.

Dunay balidong mga rason ang maong mga tunghaan sa pagpa-umento sa ilang matrikula ug sa maong sitwasyon gilauman nga ubay-ubay ang mga mamalhin ngadto sa pampublikong tunghaan.

Gawas sa mi-apply diha sa City Schools Division giingong aduna say direktang mi-apply nga modugang sa ilang matrikula diha sa rehiyonal nga buhatan sa Department of Education. (BANATNEWS)