CEBU, Philippines - Nagtingkagol sa Talisay City detention cell ang usa ka 51-anyos nga lalaki human kini pasanginling mimolestiya sa 13-anyos nga apo sa iyang kapuyo niadtong Martes sa gabii sa usa sa mga barangay sa dakbayan sa Talisay.
Ang suspetsado (pangalan gipugngan sa Banat News) mihimakak sa mga pasangil batok kaniya.
Base sa imbestigasyon sa kapolisan sa Women and Children Protection Desk sa Talisay City Police Station nga niadtong buwan pa sa Pebrero ning tuiga gisugdan sa pag-among-among sa suspetsado ang apo sa iyang kapuyo nga diha magpuyo kanila.
Ang biktima nga wala nay ginikanan giingong nahadlok pagsumbong sa nahitabo kaniya apan dihang nakatulog kini sa balay sa higala didto kini misugilon sa iyang kalbaryo sa mga kamot sa suspek.
Inabagan sa inahan sa higala sa biktima midangop sila sa barangay hall ug gipadakop ang suspek. Ang kapolisan naghikay na sa kasong ipasaka. (BANATNEWS)