Billboard kontra makililimos iplastar

CEBU, Philippines - Gipahibalo sa pangulo sa Cebu City Anti-Mendicancy Task Force (CCAMTF) nga si Isabelita Ganub nga magbutang na sila og mga billboard sa kadalanan nga mopahinumdom sa publiko kalabot sa ordinansa nga magdili sa paghatag sa mga makililimos.

Matud pa ni Ganub nga nahunahunaan sa iyang buhatan ang maong ideya gumikan kay duna gihapoy mga tawo nga tagotago nga mohatag sa mga makililimos.

Sumala pa niya nga kung tagaan og kwarta ang makililimos manganad na hinuon kini ug di na maningkamot pa ug dili usab kini ang hustong paagi sa pagtabang.

Nasuta usab sa ilang buhatan nga kasagaran sa mga makililimos sa siyudad dili taga dinhi, sagad sila makit-an diha sa dalan Colon, mga kilid sa simbahan ug sa Fuente Osmeña flyovers.

Usa sa nakitang hinungdan sa pagdagsa nila sa dakbayan sa Sugbu mao ang kaprogresibo niini sa ekonomiya.

Base sa City Ordinance 1631 o nailhan nga anti-mendicancy ordinance sa siyudad pamultahon og P1,000 ang masakpang mihatag og limos.(/EIM) (BANATNEWS)