CEBU, Philippines - Mitabang ang Provincial Intelligence Branch (PIB) sa kapolisan sa lungsod sa Compostela sa pagpangita sa usa nga kauban sa suspetsadong nadakpan nga gitumbok nga gunman sa kaso pagpamusil diin tulo ang namatay ug lima ang angol niadtong Lunes sa gabii didto sa basketball court sa barangay Tamiao sa maong lungsod.
Si Supt. Rodulfo Albotra, hepe sa PIB nagkanayon nga ila nang nailhan ang laing suspek apan dili una nila ibutyag ang ngalan niini sanglit nagpadayon pa ang ilang hot pursuit operation.
Usa ka team sa PIB ang gipadala ngadto sa Compostela nga maoy mangita sa maong suspek uban sa kapolisan sa maong lungsod.
Apan matud pa ni Albotra nga nakalayas na kini gikan sa Compostela ug tua kini karon sa bukirang lugar sa habagatang bahin sa lalawigan sa Sugbo.
Samtang ang hepe sa 78th Infantry Batallion nga si Lt. Col. Nolasco Mimpin miingon nga si Basilidis Ponce usa ka military asset kinsa nadakpan pipila ka oras human sa hitabo niadtong Lunes.
Si Ponce nga kanhi sakop sa rebeldeng New Peoples Army (NPA) nag-atubang na karon og kasong multiple murder, frustrated murder ug illegal possession of firearms nga ipasaka sa kapolisan sa Compostela ngadto sa korte karong adlawa. - BANAT NEWS