Estudyante sa STC miatras sa kaso

CEBU, Philippines - Ang mga tinun-an sa Saint Theresa’s College (STC) mibakwi sa kasong ilang gipasaka batok sa tagdumala sa STC kay wala sila papasoha sa graduation rites nila niadtong Marso.

Sa gipagawas nga order of compromised agreement tali sa STC ug kampo sa mga tinun-an gisaysay niini nga “under the request of the minor child, petition is no longer go with the case” o pinaagi sa hangyo sa mga menor de edad, dili na ipadayon ang maong kaso.

Ang kampo sa mga ginikanan sa mga tinun-an mipasaka og kasong injunction and damages sa Regional Trial Court (RTC) sa hinungdan nga wala tugoti ang   ilang mga anak sa pagpaso sa milabay’ng graduation. Usa sa katarungan sa tagdumala sa eskuylahan nga wala nila papasoha ang maong mga estudyante   mao ang mga law-ay nga hulagway niini nga giingong gipagawas   sa ilang Facebook account.

Sa sayo pa si manlalaban Joan Largo sa STC nagkanayon nga andam silang mo-file og counter claim sa mga ginikanan sa mga tinun-an tungod sa damages nga nabuhat niini batok sa STC. Dugang ni Largo nga wala madisiplina sa mga ginikanan ang ilang mga anak hinungdan   nga nakalapas kini sa balaod nga gipatuman sa eskuylahan kalabot sa pagbaton kanunay og desente nga pag-atiman sa ilang kaugalingon.

Gidugang ni manlalaban Romeo Balili nga malipayon siya sa maong desisyon nga gihimo sa kampo sa mga tinun-an.

Sa maong kaso unang mibiya sa pagkupot niini si Judge Manuel Patalinghog tungod kay alang kaniya wala siyay jurisdiction sa maong kaso.

Sa ikaduhang higayon, mi-inhibit usab ang laing huwes nga si Judge Wilfredo Navarro tungod kay matud niya wala usab siyay jurisdiction sa maong kaso kay siya anaa man sa family section ug ang maong kaso naglambigit og civil case. - BANAT NEWS