P150 mil patong sa ulo ni Ecleo

CEBU, Philippines - P150 mil ang giandam sa Campo Crame nga igante sa makapadakop kang PBMA Supreme Master ug Dinagat Island Congressman Ruben Ecleo Jr.

Atol sa Talakayan sa Isyung Pulis (Tsip) forum kagahapon sa buntag sa media center sa Police Regional Office-7, gibutyag ni Sr. Supt. Orlando Ualat, Chief of Staff sa PRO7 nga nakadawat sila og direktiba gikan ni PNP Chief Nicanor Bartolome nga ipadakop pagsiguro si Ecleo ug ang tawo nga makagiya sa kapolisan pagsikop niini gantihan og P150 mil.

Matud ni Ualat nga ang rehiyon 13 nagtukod og task force nga maoy tahasan sa pagsikop kang Ecleo ug ang kapolisan dinhi sa rehiyon 7 andam nga moabag sa maong task force.

Alang sa kadagkoan sa PRO-7 walay rason nga dili nila madakpan si Ecleo kun makadawat sila og impormasyon bahin niini.

Apan ang representante sa Regional Intelligence Division (RID) nga si Sr. Insp. Randy Caballes miingon nga sa pagka karon wala pa silay nadawat nga impormasyon bahin sa nahimutangan ni Ecleo karon.

Gitug-an usab sa kadagkoan sa kapolisan nga ang mga polis nga miyembro sa PBMA dinhi sa rehiyon 7 dili babag sa ilang pagdakop kang Ecleo. - BANAT NEWS