Miuwang sa away maoy nalubaan

CEBU, Philippines - Usa ka lalaki kinsa miuwang sa away sa iyang paryente ug sa kontra niini maoy nadunggaban angol didto sa sitio Kawayanan, barangay Poblacion Oriental, lungsod sa Compostela niadtong Martes sa hapon.

Ang biktima mao si Junosis Semblante, 25, ulitawo nga may kapuyo ug nagpuyo sa nahisgutang lugar, samtang ang suspek nailhan nga si Eliser Lalaguna, 31, minyo nga taga Bicol apan kasamtangang nagpuyo silingan sa biktima.

Nasayran nga ang biktima miuwang sa away sa suspetsado ug ni Jimmy Semblante, ig-agaw sa biktima.

Dihang gihansakan sa suspetsado og kutsilyo si Jimmy, kalit nga mipatunga ang biktima, busa siya’y natuhog sa kutsilyo ug nasabak ang iyang dughan ug tiyan.

Gihatud dayon siya ngadto sa Eversly Hospital sa dakbayan sa Mandaue samtang ang suspek nga nakasibat padayon pang gipangita sa kapolisan. - BANAT NEWS