2 ka dalagita gilugos sa 1 ka estudyante

CEBU, Philippines - Usa ka estudyante sa Culinary Arts sa iladong eskwelahan dinhi sa Sugbo gisikop sa kapolisan human pasanginli nga nanglugos sa duha ka dalagita niadtong miaging semana.

Ang nagkagulkol na karon sa prisohan giila sa ngalang Boy (tinuod nga ngalan gipugngan sa Banat News), 28 nga taga Sitio Lamak, barangay Yati, lungsod sa Lilo-an. Subay sa mga imbestigasyon sa Criminal Investigation and Detection Group (CIDG-7), nasayran nga giimbitar sa suspek ang duha ka tag 17 anyos nga dalagita nga mangaon niadtong Abril 20 sa udto, unya human sila maniudto, nag-inom sila hangtod nga nalasbag sila.

Nasayran sa kapolisan nga dihang hubog na ang mga biktima giingong gi-check-in kini sa suspek   sa Queensland Motel, sa may H. Cortes Avenue, dakbayan sa Mandaue ug didto giingong pulos gipahimuslan niini ang duha ka mga batan-on. Pagmata sa duha nianang alas 10:00 sa gabii   gibiyaan na sila sa suspek.

Human madawat sa kapolisan ang taho ila dayong gisuhid ang lugar nga estambayanan sa suspek ug didto kini masikop sa atbang sa eskuylahan sa Talamban kagahapon sa buntag.

Ang mga biktima mibahad nga desidido silang mopasaka og kaso batok sa suspetsado kinsa nagkagulkol karon sa prisohan. (WC)(BANAT NEWS)