Tingog sa katawhan ang paminawon

CEBU, Philippines -  Gipahibalo ni Mayor Michael Rama nga ang tingog sa katawhan maoy angayang paminawon, kini maoy iyang tubag labot sa tanyag sa kampo sa mga Godinez nga andam silang mohatag og financial assistance ngadto sa mga maapektohan sa demolisyon sa sitio San Miguel, Brgy. Apas ning dakbayan sa Sugbu.

Nasayran nga ang abogado sa mga Godinez nga si Atty. Roberto Palmares mibutyag nga andam mohatag ang iyang kliyente og P17 milyon nga financial assistance ngadto sa maapektohan nga 168 ka pamilya sa Apas.

Misaysay usab kini nga ang siyudad lang una ang mobayad ug ilaha lang kining ilisan sa higayon nga mabaligya nila ang maong luna. Matud pa ni Palmares nga ang maong hinabang magamit sa mga residente alang sa ilang relokasyon.

Apan si Rama nagkanayon nga nagkinahanglan pa kini og saktong husay tali sa duha ka kampo busa dili pa siya makahukom niini.

“If they need me they just go to my office and I’ll be there at the middle,” pasabot ni Rama kinsa naninguhang dili mapapahawa ang maong mga pamilya.

Ang mga lumulupyo sa Apas padayong nagbantay sa ilang mga lugar ug nagpabilin gihapon ang ilang kabalaka nga mawala ang ilang mga panimalay. (BANAT NEWS)