CEBU, Philippines - Tulo ang patay usa niini negosyante ug politiko ug laing lima pa ang naangol sa pagpamusil nga nahitabo atol sa gipahigayong variety show nunot sa nagsingabot nga kapistahan sa barangay Tamiao sa lungsod sa Compostela niadtong Lunes sa alas 9:55 sa gabii.
Ang insidente nakapasamot sa daan nang tensyonadong sitwasyon sa maong lungsod nunot sa grabeng panagribal sa mga politiko nga ning bag-ohay palang nakalingkod ang mga midaog nga mga opisyales sa lungsod pinangulohan ni Mayor Joel Quiño.
Ang unang duha nga namatay mao si Marieto Yraola, 46, negosyanteng nalambigit sa real state ug construction supply ug kandidato pagkakonsehal sa lungsod sa milabay’ng 2012 election ubos sa tiket ni kanhi mayor Ritchie Wagas nga kaatbang ni Quiño sa nakalabay’ng piniliay ug ang laing namatay mao si Marilou Mahinay, 33, asawa sa kanhi kagawad sa nahisgutang barangay.
Samtang ang unom nga naangol mao sila si Jaime Patenio Jr., 38; barangay kagawad Laila Patenio Talingting; Marian Yraola, 22, nga kanhi SK chairman sa barangay ug anak sa namatay nga si Yraola; Joy Cabrera Delos Reyes, 33, duha ka menor de edad nga 13-anyos ug 12-anyos pulos mga molupyo sa maong lugar. Usa kanila ang giingong namatay sud sa tambalanan kagahapon sa hapon, apan wala pa kini kompirmaha sa kapolisan ning pagsulat sa balita.
Samtang ang usa sa tulo ka mga suspek ang nadakpan sa kapolisan nga giilang si Basilides Aringgay Ponce, 36, nga gidudahang drayber sa mga gunmen si Ponce.
Si Sr. Supt.Patrocinio Comendador mipadala na og mga sakop sa Special Reaction Unit aron motabang sa kahapsay ug kalinaw sa lugar.
Matud ni PO2 Arni Cañete Goc-ong, imbestigador sa Compostela Police Station dihang nahinabi sa Banat News base sa ilang nakuhang mga impormasyon gilipot sa mamumuno ang biktima ug gipusil sa ulo.
Tungod sa buto nangalisang ang mga tawo nga nakaparatol sa mamumuno kinsa nagpataka nalang og pamusil ug nakaigo sa uban pang mga biktima.
Matud ni Goc-ong nasikop si Ponce nga sakay sa motor paingon nang mosibat sa sitio Mangga sa barangay Estaca ug nakuhaan og kalibre .22 magnum nga armas.
Ang kapulisan naka-recover og lima ka slugs ug upat ka kabhang sa kalibre .45 nga armas sa crime scene. Apan ang nadakpang suspek hugtanong mihimakak og kalambigitan sa krimen.
Si Comendador sa pakighinabi sa Banat News miingon nga lakip sa gisusi sa imbestigasyon ang karaang panagbangi tali sa suspetsado ug ni Yraola apan wala isalikway ang kalambigitan sa politika.
“Dili pito ang target, usa or duha siguro peru nakaigo sa uban,” sumala pa ni Comendador. Dugang pa niini nga si Ponce mao untay mo-pickup sa mga mamumuno.
Matud pa ni Wagas aktibong lider sa ilang partidong Pwersa ng Masang Pilipino si Yraola
Matud pa niya nga si Ylaora aduna pay pending election protest diha sa Regional Trial Court sa syudad sa Mandaue.
“ We are waiting for the result of the investigation of our law enforcement agencies. For the meantime, our party is also conducting an investigation. We don’t want to telegraph our move,” matud pa ni Wagas sa Banat News. (BANAT NEWS)