Ilimnong bugnaw sa sidewalk bantayan

CEBU, Philippines - Ang Integrated Provincial Health Office (IPHO) sa lalawigan sa Sugbo mipasidaan sa publiko nga magbantay batok sa mga ilimong bugnaw o cold drink nga gipamaligya sa daplin sa karsada aron dili mabiktima sa e.coli bacteria.

Ang maong pasidaan gihimo ni Dr. Cristina Giango, hepe sa IPHO kinsa nagkanayon nga ang e.coli bacteria kusog kaayo mosiaw sa panahon sa ting-init. Matud ni Giango nga kadaghanan sa katawhan niining panahona ganahan gayud nga moinom og mga pabugnaw nga gipamaligya   sa mga sidewalk vendor sama sa buko juice, mango juice, scramble, flavor of the road ice cream, bugnaw nga pakwan, pinya ug uban pa aron matambalan ang kauhaw niini.

Miingon si Giango nga gikinahanglang sutaon una pag-ayo nga limpyo ang maong ilimnon, gikan sa naninda niini kun limpyo ba ang hitsura   ug gisul-ob nga senina hinlo ba og mga kamot, ang sudlanan sa pabugnaw ang gisulod nga mga ingrediente niini, mga baso, kutsara ug uban pang gigamit sa tanang naglambigit sa maong ilimnon aron masiguro nga wala kini matapti og kagaw sa e.coli bacteria.

Sa samang higayon giawhag ni Giango ang   tanan gikan sa mga bata, hamtong ug mga tiguwang nga likayan ang subrang pagbuwad sa init sa adlaw karong summer.

Gihimo ni Dr. Giango ang maong awhag base usab sa pahimangno sa Philippine Atmospheric, Geophysical and Astronomical Services Administration (PAGASA) ngadto sa katawhan kalabot sa grabing kainit sa panahon karon nga peligro kaayo sa heat stroke. 

Dugang ni Giango nga aron kalikayan ang heat stroke gikinahanglan nga moinom og daghang tubig, likayan ang mga pagkaon nga mantikaon; ug sobrang parat ug tambok nga mga pagkaon gumikan kay kining maong mga pagkaon maoy usa sa hinungdan nga daling maigo sa heat stroke ang tawo sa higayong mabuwad kini sa sobrang kainit sa adlaw.  - BANAT NEWS